Health benefits of soy beans and soy products: a review

  • CS Venter

Abstract

Sojabone is volop, ekonomiese dieetbronne van proteïen. Tans word gefokus op die moontlike rol van sojabone in die voorkoming en behandeling van sekere degeneratiewe Westerse siektes soos hart- en bloedvatsiektes, osteoporose en sekere tipes kanker. Heel sojabone bevat 40% proteïene, terwyl sojameel, sojaproteïenkonsentraat en geïsoleerde sojaproteïen respektiewelik 50%, 70% en 90% proteïen bevat. Verskeie nie-nutriëntbestanddele soos isoflavone, protease-inhibeerders, fitiensuur, saponiene en fitosterole kom in sojabone voor en is moontlik vir sekere van die voordelige gesondheidseienskappe van sojabone verantwoordelik. Die cholesterolverlagende effek van sojabone mag te danke wees aan die aminosuursamestelling daarvan, en/of verlaagde cholesterolabsorpsie of galsoutherabsorpsie, verhoogde laedigtheidlipoproteïen-(LDL-) reseptoraktiwiteite, verlaagde lewercholesterolsintese, anti-oksidantaktiwiteit of verhoogde plasmatiroksienvlakke. Die nienutriëntbestanddele van sojabone mag vir die cholesterolverlagende, antikarsinogeniese en beenversterkende effek verantwoordelik wees. Meer navorsing is nodig om die meganismes op te klaar waardeur sojabone en sojaprodukte die gesondheid van die mens beïnvloed.
Section
Articles

Journal Identifiers


eISSN: 0378-5254